Labarik Idade Fulan 6-59 Pursentu 40 Sofre Anemia

Rezultadu Peskiza Saúde no Demografia tinan 2016, hatudu prevalensia anemia ka defisiensia ferru iha Timor-Leste sei aas, liu-liu ba labarik idade fulan 6 até 59 kuaze 40% sofre anemia tanba hahan ne’ebé fó la diversifika iha dieta.

Xefe Departamentu Pediatria, iha Hospital Nacional Guido Valadares (HNGV), Dra. Milena dos Santos Lay hateten anemia problema sériu ne’ebé afeta labarik sira, tanba defisiénsia ferru, liu-liu inan-aman sira la fó atensaun ba dieta labarik sira-nian.

“Komplikasaun husi anemia grave mak bele afeta dezenvolvimentu kongnitivu labarik nian no afeta kurasaun, liu-liu halo kurasaun bubu falla halo servisu, tanba suplay oxygen menus,” nia hateten iha Bidau, Díli.

Nia hateten feru mak substánsia ida ne’ebé prodús ran mean ka hemoglobin, entaun kuandu la konsumu aihan kontein feru mak akontese anemia, ne’ebé bele hamosu komplikasaun sira hanesan oin kamutis, lakon konsentrasaun.

Nia hatutan labarik ne’ebé sofre anemia grave risku hetan komplikasaun sira hanesan moras leukemia ka kankru ran.

Nia informa durante ne’e sira mós simu labarik na’in 15 ne’ebé hetan problema ran mean ho termu mediku bolu moras Thalasemia, ne’ebé kada fulan pasiente tenke mai halo transfusaun ran durante moris tomak. Moras Thalasemia ne’e fator risku ida mak genetika.

Iha parte seluk, Médiku Jéral, iha sala maternidade Klínika Bairo Pite, José Casmero hateten problema anemia la’ós de’it afeta labarik sira, maibé inan isin rua sira mós barak sofre anemia.

Nia dehan inan isin-rua ne’ebé sofre anemia grave risku aas ba mortalidade, bainhira lahalo intervensaun ne’ebé adekuadu ho rápidu, liu-liu inan sira ne’ebé hela iha área remota, tanba presiza hetan transfusaun ran. No bele akontese mós bebé mate iha inan nia kabun laran, tanba la hetan fornesimentu oxijeniu ne’ebé sufisiente.

“Fatór prinsipál ne’ebé ami hasoru iha terenu mak ita-nia inan sira dalaruma fiar liu informasaun lalaos ne’ebé espalla, hanesan mai parteira sira fó aimoruk ferru sulfat no ferru fumarate atu aumenta ran durante isin rua. Sira barak lakohi hemu, tanba rona informasaun bosok katak hemu aimoruk vitamina beibeik halo bebé bo’ot partus labele, ne’e fator ida akontese anemia,” nia hateten.

Nia hateten fatór seluk mak médiku sira fó akonsellamentu atu konsumu aihan ne’ebé nutritivu, liu-liu diversifika dieta. Maibé dalabarak lahalo tuir, tanba kondisaun ekonomia.

Nia informa durante ne’e sira deteta inan isin-rua sofre anemia grave mak sira halo kedas transferénsia ba ospitál nasionál atu hetan intervensaun transfusaun ran.

Tuir dadus peskiza Saúde no Demografia tinan 2016, hatudu 40% labarik ho idade fulan 6 até 59 sofre anemia. Enkuantu 23% feto idade reprodutiva 15-49 sofre anemia.