HNGV Bele Ona Halo Operasaun Troka Articulasaun

Mediku Espesialista Ruin, Nilton do Carmo da Silva hateten iha loron 26 fulan Fevereiru ekipa espesialista orthopaedic Surgeon Ospital Nasional Guido Valadares (HNGV) susesu halo operasaun ba pasiente ida ho kazu tohar iha kidan hodi troka articulasaun ne’ebe tohar (Hip Hemiarthorplasty).

Nia dehan, operasaun ida ne’e primeira vez hala’o iha Timor–Leste, liu-liu iha HNGV ne’ebe hala’o husi espesialista Timor oan sira.
Nia konsidera, susesu ida ne’e hanesan pasu importante ida hodi enkoraja komunidade sira liu –liu inan feto sira ne’ebe iha problema ho ruin parte kidan bele hakbesik aan ba iha HNGV hodi mediku sira halo desizaun ba tratamentu sira.
“Susesu ida ne’e hanesan motivasaun ida ba ekipa HNGV, nune’e iha futuru operasaun sira hanesan ne’e ita bele halo iha Timor, lalika ba rai liur tanba laiha diferensia,” nia hateten iha servisu fatin Bidau, Dili.
Nia hateten, pasiente ho problema ruin barak maibe familia la lori mai fasilidade saude hodi halo tratamentu no operasaun, tanba ne’e dala barak toba deit iha uma to’o isin liu –liu kidan kanek hotu.
Nia hatutan, moras ida ne’e dala barak afeita inan feto sira ne’ebe ho idade 76 ba leten tanba sira tama ona faze menopause, entaun hormone labele tun ba ruin hodi halo ruin laiha kualidade ona.
Ekipamentu operasaun iha HNGV seidauk iha, maibe nia dehan espesialista sira iha motivasaun bo’ot atu fo atendimentu tuir espesialidade ne’ebe sira iha.
“Sasan (ekipamentus) laiha, maibe hau impresta kolega mediku sira husi Bali nian hodi halo operasaun depois de operasaun remata, haruka fila-fali,” nia hateten.
Entretantu, bainhira jornalista tenta dada lia ho pasiente no familia pasiente kona ba susesu ida ne’e, maibe familia lakohi fo informasaun detailho kona ba moras no kondisaun pasiente nian.
Tuir observasaun TDW nian iha HNGV, haree katak pasiente ho inisial JC ho idade tinan 78 ne’ebe diagnose sofre moras Neck femur fracture, maibe depois halo operasaun troka articulasaun (ruin) pasiente bele la’o ho diak fali.