- Publika iha: 12 Março 2018
Hafoin tama tinan foun 2018, durante fulan rua (Janeiru-Fevereiru), Ospital Nasional konsege haruka tan pasientes nain 35 ba ospital sira iha rai liur hodi kontinua halo tratamentu.
Diretor Nasional Apoiu Ospitalar e Ambulansia, Horacio Sarmento hateten pasiente nain 35 ne’e nian rua mak ba iha ospital HEAI-Malaysia no seluk ba iha ospital Siloam no Sangla Bali, Indonesia.
Nia dehan, pasiente sira ne’e maioria ho moras kankru, rins no kurasaun tanba Ospital Nasional Guido Valadares (HNGV) seidauk iha kapasidade intermus ekipamentus atu halo tratamentu kontinua ba pasiente sira ne’e.
“Ita nia makina fase ran iha ne’e walu (8) deit mak funsiona, tolu la uza tanba kapasidade sala la to’o entaun ita tenke haruka,” nia hateten iha nia knar fatin, Bidau, Dili.
Nia hateten, pasiente rins nia moris depende deit ba iha makina, sira tenke fase ran dala rua ou tolu iha semana ida tanba sela’e bele mate.
Nia hateten, pasiente rins hamutuk nain 16 mak fase ran iha ospital Bali no nain 54 iha HNGV.
Entretantu, Prezidente Junta Medica HNGV doutor Nilton do Carmo hateten ekipa junta medika simu despaixu husi Ministru da Saude Rui Maria de Araujo atu halo transferensia ba moras sira ne’ebe ho karakter salva moris (saving life) tanba orsamentu limitado.
“Husu junta mediku, bainhira halo diskusaun no desizaun transfere moras ba liur tenke tetu didiak, liu –liu pasiente sira ne’ebe presiza duni asistensia katak ema (pasiente) ne’e tenke ba, se la ba mate (life saving) tanba ne’e agora ami fo prioridade ba kazu sira ne’ebe salva moris,” nia hateten.
“Ezemplu, joven ida ho idade tinan 25 ou 28 ne’ebe diagnosa rins rua ho kondisaun aat hotu, tenke haruka ba tanba la ba bele mate ho idade ne’ebe produtivu.”
Nia dehan, ba kazu sira tumor no diagnostika provizoriomente pendente lai tanba kestaun orsamentu.