- Publika iha: 20 Março 2018
Matebian ho naran Joni ne’ebe mate iha Palacio Governu oin iha loron 27 fulan kotuk, oras ne’e dadaun nia mate isin sei rai hela iha mortuario Ospital Nasional Guido Valadares (HNGV), tanba laiha familia.
Xefe Unidade Tekniku Forensik HNGV, Filomena Goncalves hateten mate isin rai hela iha mortuario, seidauk halo outopsia tanba familia laiha.
Nia dehan, semana ne’e mak laiha familia mak mai rekonese sira sei halo karta ba iha Ministerio Solidaridade Sosial hodi halot mate isin ne’e.
“Ami nia regras tau iha ne’e fulan ida, se laiha familia ida mak mai rekonese ami sei entrega ba iha MSS atu hakoi mate isin ida ne’e,” nia hateten
Nia hatutan, ba matebian sira ne’ebe ho kazu krime sira halo autopsia bainhira Ministerio Publiku fo despaixu, la presiza konkordansia ho familia tanba ne’e krime, maibe kazu sira hanesan moras mak mate ne’e sei la halo outopsia.
Iha parte seluk, official PRADET Richa Nela Estrela de Oliveira hateten matebian ne’e tuir duni atividade sira ne’ebe oferese husi programa ba ema ho moras mental ne’ebe iha dalan ninin.
Nia dehan, durante tuir atividades iha PRADET matebian sofre moras komplikasaun respiratorio, maibe matebian lakohi halo tratamentu.
“Ami servisu hamutuk ho Polisia Unidade Vulneravel (VPU) tenta buka hela familia iha Same, Munisipio Manufahi, tanba tuir informasaun matebian husi ne’eba,” nia hateten
Nia hatutan, bainhira familia laiha nafatin sira, sei kopera ho governu liu –liu MSS hodi halo’ot mate isin iha semiterio Kakaulidun.
Nia informa, iha semana kotuk sira konsege buka hetan familia matebian seluk feto ida ne’ebe sofre mos moras mental no mate isin hakoi ona iha Same.
Iha sorin seluk, Diretor Nasional Asistensia Sosial (DNAS) Mateus da Silva hateten governu pronto atu hakoi mate isin sira ne’ebe mate tanba familia la rekonese, la’o rai, laiha identidade hanesan humanu.
Kona ba matebian Joni, nia dehan governu hein karta husi HNGV katak mate isin ne’e tenke hakoi ona governu sei apoiu kaixaun no ambulansia hodi halo’ot mate isin.