Suplementu Nutrisaun F100 Iha HNGV Stok Hotu

Xefe Unidade Nutrisaun Ospital Nasional Guido Valadares (HNGV), Clementinho da Costa hateten suplementu nutrisaun susu been F100 ne’ebe atu halo tratamentu ba labarik ho malnutrisaun grave stok hotu.

Nia dehan, hahu fulan Novembru suplementu F100 ne’e laiha ona no F75 agora dadaun sei iha deit kaixa tolu.
Nia esplika, susu been F75 ne’e nia funsaun atu halo tratamentu ba iha labarik sira ne’ebe sofre malnturisaun grave (Several Acute Malnutrition) no bainhira kondisaun iha mudansa, sei kontinua ho suplementu F100 hodi hadia sira nia status nutrisaun.
“Ami mos haruka ona pedidu ba iha Ministerio da Saude atu hetan suplementu nutrisaun liu –liu susubeen F100 no F75 hodi fo atendimentu ba iha pasiente malnutrisaun iha HNGV,” nia hateten iha servisu fatin Bidau, Dili.
Nia hateten, hodi hein supplementu ne’e, HNGV iha alternative ida liu –liu nutrisionista sira fo oreintasaun ba iha kompania fornesedor aihan iha ospital atu halo mos kompras ba susu been balun hodi kahur ba labarik sira.
“Ami halo mistura tuir kompozisaun ne’ebe hanesan mos F100 no F75 ne’ebe iha sachet,” nia hatutan.
Nia hateten, iha 24 oras kada labarik ida konsumu susu been ne’e dala walu ho nia kuantidade tuir instruksaun husi mediku.
Nia informa, dadus pasiente malnutrisaun ne’ebe baixa iha sala Pedeatria HNGV kuaze labarik nain 10 kada loron.
Iha parte seluk, Diretora Ezekutivu Servisu Autonomia Medikamentus e Ekipamentus Saude (SAMES), Odete Maria Freitas Belo hateten durante ne’e suplementu nutrisaun ne’e apoia husi agensia UNICEF.
“Ba malnutrisaun moderadu ne’e suplementu sira ne’e iha, maibe ba malnutrisaun grave ne’e ita iha stok out,” nia hateten.
Nia dehan, governu lahalo kompras ba iha suplementu nutrisaun nian, UNICEF mak halo kompras, maibe iha koperasaun ho Ministerio Saude no SAMES mak halo armagenamentu.