- Publika iha: 02 Dezembro 2019
Diretora Ezekutiva, Servisu Autonomia Medikamentu e Ekipamentus Saúde (SAMES), Odete Maria Freitas Belo hateten 14% items aimoruk husi 403 items ne’ebe registu iha lista esensial Timor-Leste nian, agora dadaun iha armagen laiha.
Nia dehan items aimoruk balun laiha sei la fo impaktu ba iha servisu atendimentu saúde iha fasilidade sira tanba iha orsamentu ne’ebe alokadu atu halo kompras emergensia, bainhira presiza urgente.
“Foin lalais ami hetan tan osan montante $2 miloens husi fundu kontinjensia, entau ami tau ketak montante balun hodi responde ba items aimoruk ne’ebe laiha, liu-liu aimoruk sira ba espesialista nian atu bele halo kompras emergensia,” nia hateten iha servisu fatin, iha Kampung Alor, Dili.
Nia dehan aimoruk sira ne’ebe uza iha sentru saúde sira ne’e laiha problema tanba stok disponivel no sufisiente hela, maibe konsomiveis maka problema.
Nia informa Orsamentu Jeral do Estado 2019, ba sosa aimoruk hamutuk $3.7 miloens, maibe tanba la sufsente sira halo pedidu asesu ba osan fundu kontinjensia $2 milloens, entaun total orsamentu kompras aimoruk ba tinan ida ne’e hamutuk $5.7 miloens.
Iha parte seluk, Diretur Servisu Saúde Munisipio Lautem, Bernardo Amaral Lopes hateten dala ruma aimoruk items balun laiha, maibe sira iha aimoruk seluk ne’ebe bele substitui tanba kura moras hanesan.
“Ami iha munisipio mos iha verba ida kada trimestre $450 hodi kompras aimoruk ne’ebe justifika iha armagen SAMES laiha, maske la rezolve hotu, maibe bele aguenta,” nia hateten.
Nia dehan moras ne’ebe registu a’as iha munisipio Lautem maka moras Infesaun Respiratorio Alto (ISPA), kabun moras (diarea).