- Publika iha: 28 Julho 2023
Falintil Forsa Defesa Timor-Leste (F-FDTL) liu-liu Komponente Forsa Naval Lijeira iha ona armajen hodi rai arma sira ho seguru.
Komandante Komponente Forsa Naval Lijeira, Kapitão Mar no Guerra Higinho das Neves dehan armajen refere apoiu konstrusaun no fasilidade sira oferese husi parseru forsa Australia ni’an, atu bele asegura arma sira atu labele ferrujen.
“Dadaun ne’e ita-ne’e ita bele asegura ona ita-nia arma sira, iha armajen ho seguru atu nune’e bele livre husi ferrujen,” nia dehan.
Nia dehan, antes ne’e arma sira asegura de’it iha kontainer laran, no la seguru, tanba AC ne’ebé mak monta la másimu hodi kobre arma sira iha laran ikus mai tenke ferrujen.
“Ba oin ita bele asegura ona ita-nia arma iha armajen seguru ne’ebé mak ita iha,” Komandante das Neves dehan iha Naval Hera.
Enkuantu nia dehan, aleinde konstrui armajen seguru hodi rai arma, Australia mós sei konstrui tan armajen hodi asegura ekipamentu importante seluk ne’ebé forsa naval iha.
Iha fatin hanesan, Asosiasaun Defesa Australia ba Timor-Leste Coronel Paul Pembroke dehan, apoiu konstrusaun no apoiu fasilidade ba armajen rai-arma ne’e liuhusi Programa Kooperasaun Defeza (DCP) nian.
Nia dehan, instalasaun armajen foun ne’e importante tebes hodi rai-arma sira ho seguru, iha tempu naruk nune’e labele hetan estragus.
“Armajen ne’e instala kompleta ho fasilidade sira, kompostu husi fasilidade eletrisidade, AC ne’ebé kualidade aas, nune’e mós fasilidade ba tékniku armajen nian,” Coronel Pembroke dehan iha Hera.