- Publika iha: 25 Agosto 2011
Kilat illegal ne’ebe durante ne’e diskunfia espalla iha komunidade sira nia le’et no sai preokupasaun iha publiku, tuir fonts konfirmadu husi Komando Polisia Distrital Dili, katak informasaun ne’e hanesan rumores deit.
“Ami halo ona operasaun e laiha kilat illegal, so ke ita nia komunidade konfundi sala ho motor lian kanun resin ne’ebe komunidade sira hanoin katak ne’e kilat nia lian,lolos kilat illegal laiha,”informa fonts konfirmadu ne’e, semana kotuk iha Komando Polisia Distrital Dili, Kaikoli,Dili.
Maske nune’e, nia parte kontinua halo operasaun ba iha komunidade sira hodi hatene lolos kona-ba rumoris sira ne’e.
Iha parte seluk,Tomas Saldanha, komunidade Kampung Tuti, Bebonuk hatete, nia parte trauma bainhira rona katak sei iha kilat illegal balun ne’ebe espalla iha nasaun ida ne’e.
“Ami mos rona kilat tarutu no ami mos rona akontesimentu iha parte Bidau nian,nusa mak dehan kilat illegal laiha,” nia dehan.
Tanba ne’e, nia husu ba PNTL no F-FDTL atu toma atensaun ba rumoris ne’e hodi buka tuir kilat sira ne’e, nune’e bele prevene buat ne’ebe ema hotu la espera atu akontese.
