- Publika iha: 30 Agosto 2011
Relasiona ho lampu trafiku ne’ebe mate iha tempu kalan, tuir Staf Senior Trafic light Diresaun Nasional Transporte e Terestres (DNTT), Joao Eugenio C.da Silva katak tanba kalan laiha movement transporte.
“Lampu lakan husi tuku 07:00 to’o tuku 09:00 kalan deit , iha tuku 09:00 kalan ami tau kedip to’o fali tuku 07:00 dadersan,tanba kalan kareta halai ladun barak,”hateten Joao Eugenio C.da Silva semana kotuk iha Balide,Dili.
“Ita mos tauk ema biasa para iha lampu merah, nia para mesak mak ema ruma baku mate nia iha ne’eba, ne’e krimi ona tanba ne’e mak ita tau kedip (lampu kinur lakan -mate) deit maibe sira tama mos kuidadu,”Eugenio informa.
Iha parte seluk tuir komunidade Colmera, Nelson Filipe, katak lampu tranzitu tenke loke durante 24 oras nune’e kondutor sira labele halai arbiru.
“Ami hare iha tempu kalan lampu tranzitu mate piska-piska halo kareta sira halai arbiru deit e halai la tuir nia dalan,” nia dehan.
Tuir Nelson, wainhira iha tempu kalan, ema la’o ba mai atu hakat ba estrada sorin senti tauk tanba lampu lafunsiona.
“Ne’ebe se bele karik,lampu tranzitu labele hamate ,husik lakan to’o rai loron,”nia husu.
Entretantu bainhira jornalista tenta konfirma asuntu ne’e ba iha Komandante Polisia Tranzitu, Superintendente Xefe Antonio Soares, maibe lakonsege tanba lahetan autorizasaun husi Komando Jeral hodi fo informasaun ba publiku.